Nancy Isime Yarn Truth: Body No Be Your Property Again Once You Be Actor

Naija, oya gather round because Nancy Isime just enter Yanga FM and burst tape for the gist. Nancy Isime waka enter What’s Up Naija show for Yanga FM, and she no come play. The Blood Sisters babe wey just chook hand inside one blockbuster wey scatter Netflix. She open mouth talk things plenty people dey think but no fit yarn for camera.

Once You Sign Up To Act, Your Body Don Sell Pass You

Nancy drop one line wey go cause argument for every barber shop and salon for the next one week. She yarn say once you be actor, your body no really belong to you again  na the role go determine how you go look.

She break am down well well. If the role be person wey dey chop like say na competition, she go simply add the weight, no dulling. She no go dey use padding or shakara to cheat the character. She remember as she do that “love during pandemic” movie, na she herself add weight by herself for her role . . That kain dedication no common o, plenty actors go just dey talk am for interview but Nancy don already do am for real life.

Even Idris Elba Gree Say Madam Serious

You sabi say when international star like Idris Elba notice you, you don arrive. Nancy yarn say when she cross Idris Elba  for Lagos one time, the man no waste time, he comot mouth talk say she dey devoted to how she carry herself and her craft.

Nancy Isime at Yanga Fm

Our girl say that one na exactly the vibe she dey chase. She no wan carry last as an unserious actor wey no get intention for her work. According to her, na that level of seriousness dey separate the real ones from the ones wey just dey “act” for Instagram caption.

The Surgery Gist Wey Everybody Dey Wait For

Naturally, the What’s Up Naija crew no fit resist, dem ask her point blank “Madam, you don go under the knife for any of these body transformations?”

Nancy no dodge am at all, she gba the question well well. She say body na person outlook, and physicality dey play big role for acting work. She add say, bottom line, anybody fit do wetin dem like with their own body no condition attached. Straight from the horse mouth, no shaking, no dulling.

The Big Picture

This kain gist dey come at the right time sha, because Nollywood actors don begin yarn more about the real sacrifice. Wey choke  behind these “blockbuster” roles wey we dey clap for online . Nancy Isime just join the league of artists wey no go gree make people think acting na just glamour and red carpet.

Whether you dey team “Nancy just dey built different” or team “abeg this industry need better support for these actors,” one thing clear pass be say  Nancy Isime no come play play. She come do the work, body, mind, and all.